(RWU)စွမ်းရည်မြှင့်တင်ရီး သင်တန်းဆင်းပွဲအခမ်းအနားကျင်းပ

ရခိုင်အမျိုးသမီး အစည်းအရုံး (RWU)က ပြုလုပ်တေ အမျိုးသမီးစွမ်းရည် မြှင့်တင်ရီး သင်တန်း အပတ်စိုင်(၈) သင်တန်း ဆင်းပွဲအခမ်းအနား တစ်ခုကို လွန်ခရေ(၂၀၊၅၊၂၀၁၂)ရက်နိန့်က ဘင်္ဂလာဒေ့ခ်ျနိုင်ငံ ဖလောင်းချိတ်ခရိုင် နွားရုပ်တောင်ရွာ (RDF)ခန်းမမှာ မွန်းတည်း(၁)နာရီက ညဇာ(၄)နာရီထိ ကျင်းပပြုလုပ်ခကြောင်း လေးဝတီက သတင်းရဟိပါသည်။

အဆိုပါအခမ်းအနားကို ဖိတ်ကြားထားရေ ရခိုင်နိုင်ငံရီး ဂေါင်းဆောင်ကြီးများ မျိုးချစ်ပြီချစ်များ တသီးပုဂ္ဂလများ လူကြီး လူငယ်အားလုံး(၄၀)ကျော် တက်ရောက်ခကြောင်း သိရပါသည်။

နှစ်စိုင်ကျင်းပပြုလုပ်တေ သင်တန်းကို သင်တန်းတက်ရောက်နိန်ဂတ်တေ ရခိုင်အမျိုးသမီးချေတိရေ ရခိုင်ပြည်(၁၇)မြို့နယ်က ပါဝင်ကတ်ကြောင်းလေ့ သိရပါရေ။ ယင်းသင်တန်းသို့ ဒုက္ခမျိုးစုံကြားထဲက စိတ်ဝင်တစားလာရောက် သင်တန်းတက်ရောက်လာကတ်စော်ပါ။

သင်တန်းမှာ ပထမဆုကို ရဟိလားရေ မစောဟေရီအောင်က အဂုပိုင်ပြောပြပါသည်။

“အကျွန်ရေ ပါပါဘားကတဆင့် ပြည်ပမှာ(RWU)အဖွဲ့သတင်းကို ကြားရေနိန့်ကဘင် စိတ်ဝင်စားခရေအတွက် မိဖဘားက ခွင့်ပြုချက်နန့် ရောက်အောင် လာဖြိုက်ပါရေ မိဖအိမ်မှာ နိုင်ငံရီး တိုင်ရေးပြည်ရာ တခုလေးမသိခဘာ။ (RWU)အဖွဲ့က ကျေးဇူးရှင်လေးဖြိုက် အမိပိုင်ကူညီစောင့်ရှောက်သွန်သင်ပီးရေ။ ဆရာမ ဒေါ်စောမြရာဇာလင်းကို ကောင်းကောင်းကျေးဇူးတင်ဘာရေ။ အကျွန် မသိခရေ ရခိုင်သမိုင်း၊ ရခိုင်လူမျိုးတန်ဖိုးနန့် အကျွန်ရို့ ရခိုင်လူအဖွဲ့အစီး ဇာအဆင့်မှာ ရောက်နိန်ရေ၊ အမျိုးသမီးအမျိုးသား လူ့အခွင့်အရီး အကြောင်းအရာတိကို အကျွန်သင်တန်းတလျှောက် စိတ်ပါဝင်စားစော် သင်ယူဘာရေ  ယင်းကြောင်း ဒေပိုင်ပထမဆုကို ရဟိစော်’’ ပါလို့ လေးဝတီကို ပြောပြပါရေ။

တဆက်တည်း ပြောခစွာက “အကျွန်နန့် တတူသင်တန်းတက်နိန်ဂတ်တေ မြေပုံ၊ အမ်း၊ မန်အောင် ရခိုင်ပြည်တောင်ပိုင်းက အကျွန်ရို့သွီးချင်း ညီအစ်ကိုမောင်နှမတိနန့် ယင်းဒေသအခြေအနေတိကို တိတိကျကျသိခွင့်မှတ်တမ်း တင်ခွင့်တိရဘာရေ။ အကျွန်ရို့ ရခိုင်တမျိုးသားလုံးကို အုပ်ချုပ်ထားရေ ဗမာစစ်အစိုးရက ဇာလောက်ထိ ဖိနှိပ်ထားရေ၊ လူသားချင်းစာနာထောက်ထားမှု ကင်းမဲနိန်ရေ ဆိုစော်တိကိုသိရဘာရေ။ အကျွန်ဆန္ဒက ဖြိုက်နိုင်ကေ ရခိုင်တပြည်လုံးက အမျိုးသမီးအမျိုးသားချေတိကို ခေါ်ယူပြီးကေဒေပိုင် မိမိရို့ရေ မိမိရို့  သမိုင်းကို အကျွန့်ပိုင်လေ့လာသင်ကြားစီချင်ပါရေ’’လို့ ဆိုပါရေ။

ပထမဆုံး (RWU-ခေါ်-Rakhaing Woman Union)ရခိုင်အမျိုးသမီး အစည်းအရုံးအဖွဲ့ကို စပြီးကေ တည်ထောင်ခရေဆရာမ ဒေါ်စောမြရာဇာလင်းကလေး “အကျွန်ရေ အတိတ် အနာဂတ် ပစ္စုပန်  ကာလသုံးခုနန့်ပြောပြဘာမေ။ ဒေသင်တန်းကို (၂၀၀၁)ခုနှစ်မှာအဖွဲ့ဝင်ရှစ်ယောက်နန့် စတင်လုပ်ဆောင်ခပြီးကေ အမျိုးသား အမျိုးသမီး နှစ်ရပ်နိန်ထိုင်ရေ ကမ္ဘာကြီးမှာ အမျိုးသမီးအဖွဲ့ အမျိုးသားအဖွဲ့ သီးခြားရပ်တည်လို့မရနိုင်ပါ။ အမျိုးသားအမျိုးသမီး ဒေလူသားနှစ်ရပ်သည် အကျိုးတူပူးပေါင်းဆောင်ရွက်ကေ အိမ်တွင်းပုန်းဘဝနန့် ရင်ဆိုင်နိန်ရရေ ရခိုင်အမျိုးသမီးဘဝချေတိကို စွမ်းရည်မြှင့်တင်ရီး သင်တန်းတိကို အမျိုးသားနန့် အမျိုးသမီးတိကို(၂၀၀၁)ကဘင်ပီးခပါရေ။ အဂုလက်ဟိအနိန်အထားမှာလေး အကျွန်ရို့ရခိုင်အမျိုးသမီးတိရေ။ စီစိုင်ညွန်ကြား ပို့ချပီးနိန်စော်တိရေ ရခိုင်အမျိုးသမီးအသိုင်းအဝိုင်းမှာ ကောင်းကောင်းနည်းပါသိမ့်ရေ။ အပြုသဘောဆောင်ရေ ဆက်ဆံရီး ကျားမတန်းတူရေးအသိ။ ခွဲခြားဆက်ဆံနိန်စော်တိ ရခိုင်ပြည်နန့် ရခိုင်လူထုကြားမှာ စိတ်ဝမ်းမကွဲဘဲ လက်တွဲလုပ်ဆောင်သင့်ရေလို့ အကျွန့်အနိန်နန့်မြင်ဘာရေ။ လုပ်တေအချိန်မှာလေး အသိတရားမပြည့်ဝဘဲ တိုင်းပြည်ချစ်စော်ထက် အသိတရား ပြည့်ပြည့်ဝဝနန့် တိုင်းပြည်ချစ်ဖို့လိုအပ်တေစော်မှာ အရည်အချင်းပြည့်ဝရေ အမျိုးသားအမျိုးသမီး ပေါင်းများစွာကို ဒေသင်တန်းကမွီးထုတ်ပီးနိုင်ဖို့လို့ ယုံကြည်ကြောင်း’’ ရှင်းပြပြောကြားပါရေ။

ယင်းနောက်သင်တန်းဆင်းပွဲမှာ ပထမဆုကို စောဟေရီအောင်(မြောက်ဦး)

ဒုတိယဆု စောအေးနန္ဒာ(စစ်တွေ)

တတိယဆုကို စောခင်မိုးဝေ(မင်းပြား)

နိုင်ငံရီးဂေါင်းဆောင်မှုဆုကို စောသီရိရည်မွန်(မန်အောင်)

စေတနာရှင်ဆုကို စောပြည့်လင်း(မောင်တော)

ဘာသာရပ်ဆိုင်ရာ တဘာသာမှာ အကောင်းဆုံးဆု နိုင်ငံရီးသိပ္ပံဆုကို စောသီရိရည်မွန်။

အင်္ဂလိပ်စာအကောင်းဆုံးဆုကို စောအေးနန္ဒာ။

လူ့အခွင်းအရီးဆုကို စောဟေရီအောင်။

စာသင်ခန်းထဲက အပတ်စိုင်အင်္ဂလိပ်စာ စစ်ဆီးချက်ဆုကို စောဟေရီအောင်ကရဟိဘာရေ။

ဆုပီးပွဲစစ်ဆီးရာမှာ အမှတ်(၁၀၀)ကျော်ကွာပြီးကေ စောဟေရီအောင်ကို တွိဟိရဘာကြောင်း အကောင်းဆုံးထူးချွန်ဆုတိကို ချီးမြှင့်ရစော်ဖြိုက်ဘာရေ။

အနာဂတ်မှာလေး ပြည်ပပြည်တွင်းမှာဖြိုက်စီ အကျွန်ရို့ ရခိုင်လူမျိုးကို အခြားနိုင်ငံတကာနန့် စံချိန်မှီဖြိုက်အောင် လုပ်ဖို့ဆိုကေ အရည်အခြင်းပြည့်ဝရေ မျိုးဆက်သစ်တိကို မွီးထုတ်ပီးဖို့လိုအပ်နိန်ဘာရေ ယင်းအတွက် ဒေပိုင်သင်တန်းတိကို ဆက်လက် ပြုလုပ်လားဖို့လို့ အကျွန်အနိန်နန့် သံဓိဌါန်ချထားဘာရေ’’လို့ ပြောပြပါရေ။

ရခိုင်အမျိုးသမီးအစည်းအရုံးရေ ရခိုင်လူ့အဖွဲ့စည်းပြည်ပမှာ အခက်အခဲမျိုးစုံကြားက ရပ်တည်နိန်ရေ ခံယူချက် ယုံကြည်ချက် ပြည့်ဝခိုင်မာရေ အဖွဲ့အစည်းဖြိုက်ကြောင်း အဖွဲ့ခွဲတိကို ထိုင်း၊ မလေးရှား၊ ဘင်္ဂလာဒေခ်ျ့ နန့် တခြားနိင်ငံတိမှာလေး ကျယ်ကျယ်ပြန့်ပြန့် လုပ်ဆောင်လားဖို့လေးသိရပါရေ။

သင်တန်းသားတိအတွက် ပြင်ပက နိုင်ငံရီးဂေါင်းဆောင်တိ အဖွဲ့အစီးက ဂေါင်းဆောင်ကြီးတိ လာရောက် သင်တန်းပီးဂတ်ကြောင်း လွန်ခရေ(၇)ကြိမ်မြောက်က ခိုင်ပေါ်လင်း စောလင်းထွန်း မီဒီယာက ကိုကျော်မိုးရို့ လာရောက်ပြပီးဂတ်ကြောင်းနန့် ဒေနှစ် အကြောင်းအမျိုးမျိုးနန့် မလာရောက်နိုင်ခဂေလည်း ခိုင်အာဏာနီက အပတ်တိုင်းလာရောက် သင်တန်းပီးခကြောင်း နောက်သင်တန်းတိမှာ အမြဲတမ်းသင်တန်းအတွက် ကြိုတင်စီစိုင်လားဖို့လေး သင်တန်းတာဝန်ခံက ပြောဘာရေ။

အွင်လိုင်းနန့်ဆိုရေ ပညာရပ်၊ ကွန်ပျူတာနန့်ဆိုင်ရေ ပညာရပ်တိကို အမြဲသင်ကြားပီးနိုင်ဖို့ မီးစက်တလုံး လိုအပ်နိန်ရေလို့လေ့ သိရပါရေ။ ယင်း လိုအပ်ချက်ကို ဖြည့်ဆီးပီးလိုရေ စေတနာရှင်တိအနိန်နန့် ပါဝင်လှူဒါန်းဖို့ ဆိုကေ (rakhaingwomenunion@gmail.com) အီးမေးလ်ကို လည်းကောင်း။ မိုဘိုင်းဖုန်းနံပါတ် 0088 01830879473 နန့် 0088 01732649007 တိကို ဆက်သွယ်နိုင်ပါကြောင်း သိဟိရပါသည်။

ခိုင်ဥက္ကာပျံ